Kryeministri i Republikës së Kosovës, Albin Kurti, bashkë me Zëvendëskryeministrin Besnik Bislimi, Ministren e Ekonomisë, Artane Rizvalloni dhe Ministrin e Financave, Punës dhe Transfereve, Hekuran Murati, mbajtën sot një takim virtual me Drejtoreshën Menaxhuese të BERZh-it për Evropën Qendrore dhe Juglindore, Charlotte Ruhe, dhe ekipin e saj.

Kryeministri Kurti falënderoi Ruhe për mbështetjen e deritanishme që BERZh-i i ka dhënë shtetit të Kosovës, shkruan arbresh.info.

Ai foli për rëndësinë e vazhdimit të bashkëpunimit, duke theksuar këtu nevojën për rritje të dinamikës në zbatimin e projekteve infrastrukturore siç është ai i rehabilitimit të linjës hekurudhore Han i Elezit – Leshak. Po ashtu, u diskutua edhe mbi idenë e krijimit të një mekanizmi të përhershëm për implementimin e projekteve infrastrukturore.

Në takim u diskutua edhe për ndërmarrjet publike dhe tranzicionin e tyre nën ombrellën e një fondi sovran, ashtu që të sigurohet një funksionim më i mirë i tyre.

Gjithashtu, u diskutua edhe për mbështetjen e sektorit privat nga ana e BERZh-it, me vëmendje të veçantë ndaj ndërmarrjeve që udhëhiqen nga gratë.

Ruhe uroi kryeministrin Kurti për rezultatin zgjedhor, dhe tha se BERZh-i do të vazhdojë mbështetjen e mëtutjeshme të projekteve zhvillimore, sidomos atyre që çojnë drejt një ekonomie të gjelbër./arbresh.info/